सूर्यपुरामा क्षमताअनुसार विद्युत् उत्पादन हुन सकेन

सूर्यपुरामा क्षमताअनुसार विद्युत् उत्पादन हुन सकेन परासी, २४ असार । नवलपरासीमा रहेको सूर्यपुरा विद्युत् उत्पादन गृहमा क्षमताअनुसारको विद्युत् उत्पादन हुन सकेको छैन । प्रतिघन्टा १५ मेगावाट विद्युत् उत्पादन गर्ने क्षमता भएको यस केन्द्रमा हाल प्रतिघन्टा ३ दशमलब ५ मेगावाटमात्र विद्युत् उत्पादन हुने गरेको छ । गृहमा रहेका तीनवटा युनिटमध्ये दुईवटा पूर्णरुपले बिग्रिएका कारण मर्मतपश्चात् एउटामात्र युनिट सञ्चालन हुँदा वर्षांैदेखि क्षमताअनुसार विद्युत् उत्पादन हुन नसकेको केन्द्रका प्रमुख सुरेश रावतले बताउनुभयो । आगामी आर्थिक वर्षमा बन्द अवस्थामा रहेका दुईवटा युनिटलाई मर्मत गरी सञ्चालन गरिने योजना रहेको केन्द्रले जनाएको छ । मर्मतका लागि बढी खर्च लाग्ने भएकाले आगामी वर्षमा बजेटमा समावेश गरी युनिट मर्मत गरिने प्रमुख रावतले जानकारी दिनुभयो । विसं २०१६ मा गण्डक सम्झौताअनुसार भारतले नवलपरासीमा प्रतिघन्टा १५ मेगावाट विद्युत् उत्पादन गर्ने प्रविधिसहित गण्डक जलविद्युत् केन्द्र स्थापना गरिदिएको थियो । रासस