काठमाडौँका पचास अगुवा किसानलाई परिचयपत्र वितरण

काठमाडौँका पचास अगुवा किसानलाई परिचयपत्र वितरण काठमाडौँ, २५ असार । ईन्द्रायणी शङ्करापुर–१५ मा तरकारी खेती गर्दै आउनुभएकी सीता राई सदाभन्दा आज खुसी देखिनुहुन्थ्यो । कुल १४ रोपनी जग्गामा आधुनिक तरिकाले गोलभेँडा खेती गर्दै आउनुभएकी राईको ईन्द्रायणी व्यावसायिक कृषि फार्मले चार जनालाई रोजगारी दिएको छ । कृषि विकास मन्त्रालयले प्रदान गरेको उद्यमी कृषक परिचयपत्र पाएपछि रासससँग कुरा गर्दै राईले भन्नुभयो, “सधैँ धुलोमा खेल्ने, फोहोरी भनेर हेला गर्ने किसानलाई आज राज्यले चिन्यो र किसान भएको परिचयपत्र पनि दियो ।” गोलभँेडाखेतीबाट वार्षिक पाँच लाख रुपैयाँभन्दा बढी कमाइ हुने गरेको बताउनु हुने राई परिचयपत्र पाएपछि कृषि विकास मन्त्रालयबाट अनुदानमा न्यूनतम रु ५० हजार र अधिकतम रु दुई लाखसम्म ऋण पाउनेमा आशावादी हुनुहुन्छ । कीर्तिपुरकी पूर्णदेवी महर्जनले पनि आजै किसान परिचयपत्र पाउनुभयो । गोलभेँडा, काउली, सागको व्यावसायिक खेती गर्दै आउनुभएकी महर्जन पनि वर्षमा रु तीन लाखसम्म कमाइ गर्नुहुन्छ । सरकारले किसान भनेर चिनेकामा उहाँलाई खुसी लागेको छ । उहाँ भन्नुहुन्छ, “गोलभेँडा, काउली र साग बेचेर पाउने खुसीभन्दा बढी खुसी आज लागेको छ ।” परिचयपत्र देखाएर कृषि विकास बैंकबाट ऋण लिने र खेतीलाई बढाउने उहाँको सोच छ । परिचयपत्र लिन आउनुभएका कीर्तिपुरका राहुल केसी, कविर महर्जन र धर्मस्थलीकी प्रमीला अर्याल पनि परिचयपत्रलाई हालसम्मकै ठूलो उपलब्धिको सङ्ज्ञा दिनुहुन्छ । जिल्ला कृषि विकास कार्यालय र नेपाल चेम्बर अफ कमर्सले आज यहाँ आयोजना गरेको उद्यमी कृषक परिचयपत्र वितरण तथा प्राङ्गरिक खेती प्रवद्र्धन गोष्ठीमा काठमाडौँका ५० अगुवा कृषकलाई परिचयपत्र वितरण गरिएको थियो । कृषि विकास मन्त्रालयका सहसचिव श्यामकिशोर साहले सरकारको योजनाअनुसार नै कृषकलाई परिचयपत्र वितरण गर्न सुरु गरिएको बताउनुभयो । परम्परागत खेतीबाट क्रमशः व्यावसायिक बन्दै गएको कृषिमा युवालाई सहभागी गराउन र विदेशमा होइन स्वदेशमा नै सुन फल्छ भन्ने सन्देश प्रवाह गर्न परिचयपत्र वितरण गरिएको उहाँको भनाइ थियो । सरकारले व्यावसायिक किसानका लागि ६ प्रतिशत ब्याजमा दुई लाख रुपैयाँसम्म ऋण दिने व्यवस्था गरेको छ । पशुपालन, माछापालनमा लाग्ने युवा किसानलाई अनुदानसमेत दिएको छ । सरकारले गत बुधबार सार्वजनिक गरेको नीति तथा कार्यक्रममा समेत कृषिलाई व्यावसायिक बनाउने लक्ष्य राखेको छ । नेपाल चेम्बर अफ कमर्सका उपाध्यक्ष लोकमान्य गोल्छाले परम्परागत कृषि व्यवसायलाई व्यावसायिक बनाउन आफूहरु सहयोग गर्न तयार रहेको बताउनुभयो । कृषि विकास मन्त्रालयले ‘तीन गाई १० रोपनी जग्गा, रसायनबिना खेती हुन्छ पक्का’ भन्ने अवधारणाका साथ कृषकलाई उद्यमी बनाउने रणनीतिसमेत अगाडि सारेको छ । सो रणनीतिलाई सफल बनाउन चेम्बरले पनि साथ र सहयोग प्रदान गर्ने गोल्छाको भनाइ छ । जिल्ला कृषि विकास कार्यालयका बागवानी विकास अधिकृत रेवतीराज शर्मा किसानको पीर, मर्का बुझ्न र उनीहरुलाई व्यावसायिक बनाउन परिचयपत्र प्रभावकारी हुने बताउनुहुन्छ । कार्यक्रममा प्राङ्गारिक खेतीको उपादेयताका बारेमा कृषि विकास विभागका महानिर्देशक डा यज्ञध्वज जिसी र वरिष्ठ कृषि विकास अधिकृत अरुणप्रकाश भट्टले कार्यपत्र प्रस्तुत गर्नुभएको थियो । रासस